अमरावती / तिवसा तालुक्यातील वर्धा नदीच्या पात्रातून पोकलेनने वाळूचा अवैध उपसा व चोरटी वाहतूक करणाऱ्या चार आरोपींना स्थानिक गुन्हे शाखेने अटक केली. दि. ४ मे रोजी रात्री ही कारवाई करण्यात आली. कारवाईदरम्यान ९६ लाख रुपये किमतीचे आठ ट्रक, १६ लाख रुपये किमतीचे दोन ट्रॅक्टर, ६० लाख रुपये किमतीचे दोन पोकलेन, दुचाकी व चार मोबाइल असा एकूण १ कोटी ७२ लाख ९० हजार रुपयांचा मुद्देमाल जप्त करण्यात आला.
याप्रकरणी, तब्बल १९ जणांविरुद्ध तिवसा पोलिसांत गुन्हे दाखल करण्यात आले. सुनील रामदास घोगरे (४४ वर्ष, रा. वडरपुरा, अमरावती), मंगेश पुंडलिकराव बरडे (२८, रा. शेंदरीपुरा, चांदूर रेल्वे), पिरू मोहम्मद जानीचाले (४०), रामा महादेव चौधरी (४५, दोघेही रा. फ्रेजरपुरा, अमरावती) यांना अटक करण्यात आली. तर घाटमालक अर्शद अली आबीद अली (रा. अमरावती) व १४ जण फरार आहेत. स्थानिक गुन्हे शाखेचे पथक तिवसा हद्दीत पेट्रोलिंग करीत असता त्यांना तिवसा हद्दीतील परतोडी गावासमोरील वर्धा नदीचे पात्रातील वाळूच्या अवैध उत्खनाबाबत माहिती मिळाली. तेथील क्षार घाटात अर्शद अली हा काही इसमांना हाताशी धरून पोकलेनच्या मदतीने नदीमध्ये उत्खनन करून ती वाळू ट्रकमध्ये भरत असल्याच्या माहितीवरून एलसीबी पथक तेथे पोहोचले.
काय पाहिले पथकाने पथक परतोडी येथे गेले असता वर्धा नदीचे पात्रात पश्चिम किनाऱ्यावर क्षार घाटात रेतीचे अवैध उत्खनन सुरू होते. काहीजण पोकलेनने ती वाळू ट्रकमध्ये भरताना दिसले. बरेच ट्रक एकामागे एक असे रांगेत दिसून आले. घाटावर दोन ट्रॅक्टर ट्रॉलीमध्ये चाळण्या फिट करुन त्यामध्ये रेती गाळणीचे काम सुरू होते. तो घाट महसूलने कुणालाही वितरित केला नसल्याची खात्री होताच पथकाने चौघांना जागीच ताब्यात घेतले.
घाटमालकही आरोपी आरोपी रेती वाहतुकीबाबत रॉयल्टी किंवा परवाना सादर करू शकले नाहीत. तो घाट फ्रेजरपुऱ्यातील अर्शद अली याच्या मालकीचा असल्याचे स्पष्ट झाल्याने त्यालादेखील आरोपी करण्यात आले. एसपी विशाल आनंद, एलसीबी प्रमुख किरण वानखडे यांच्या मार्गदर्शनात उपनिरीक्षक सागर हटवार व मूलचंद भांबूरकर, अंमलदार अमोल देशमुख, मंगेश लकडे, चंद्रशेखर खंडारे, सचिन मसांगे, संजय प्रधान यांनी ही कारवाई केली
Author: Z 24 News
z24news.dreamhosters.com
