लखनौ: उत्तर प्रदेशातील लखनौमध्ये एक हृदयद्रावक घटना समोर आली आहे. येथे एका विवाहित पुरुषाने आणि त्याच्या प्रेयसीने धावत्या ‘वंदे भारत एक्सप्रेस’ समोर उडी मारून आत्महत्या केली. ही घटना शनिवारी (दि. १०) दुपारी तालकटोरा पोलीस ठाण्याच्या हद्दीतील जलालपूर रेल्वे क्रॉसिंगजवळ घडली.
नेमकी घटना काय? पोलिसांनी दिलेल्या माहितीनुसार, मृतकांचे नाव सूर्यकांत (वय ४०) आणि दीपाली (वय २५) असे आहे. प्रत्यक्षदर्शींनी सांगितल्यानुसार, हे जोडपे दुपारच्या सुमारास रेल्वे ट्रॅकच्या आसपास फिरताना दिसले होते. सुमारे अडीच तास ते तिथेच थांबून होते. जशी वंदे भारत ट्रेन जवळ आली, तसे दोघांनीही अचानक ट्रॅकवर झोपून आपली जीवनयात्रा संपवली. ट्रेनच्या धडकेत दोघांचाही जागीच मृत्यू झाला.
एकाच ऑफिसमध्ये काम आणि प्रेमसंबंध तपासात उघड झाले की, सूर्यकांत आणि दीपाली हे लखनौच्या सदर भागातील एकाच खाजगी कंपनीत काम करत होते. सूर्यकांत हा फील्ड वर्कर होता, तर दीपाली कॅशियर म्हणून काम पाहत होती. सूर्यकांत हा विवाहित असून त्याला पत्नी आणि एक ७ वर्षांचा मुलगा आहे, तो नीलमाथा भागात राहत होता. दुसरीकडे, दीपाली अविवाहित होती आणि तिच्या कुटुंबियांनी ती बेपत्ता असल्याची तक्रार सुशांत गोल्फ सिटी पोलीस ठाण्यात दिली होती.
घटनास्थळी सापडल्या महत्त्वाच्या गोष्टी पोलिसांना घटनास्थळी एका बॅगमध्ये सुसाईड नोट सापडली आहे. यामध्ये त्यांनी “आम्ही एक होऊ शकत नाही, त्यामुळे जीव देत आहोत, आम्हाला माफ करा,” असे लिहिल्याचे समजते. विशेष म्हणजे, आत्महत्या करण्यापूर्वी या दोघांनी कथितरित्या लग्न केल्याचा अंदाज वर्तवला जात आहे, कारण दीपालीच्या भांगेत सिंदूर भरलेला आढळून आला.
पोलिसांचा तपास सुरू रेल्वे ट्रॅकवर मृतदेह आढळल्यानंतर जीआरपी (GRP) आणि स्थानिक पोलिसांनी घटनास्थळी धाव घेतली. मृतदेहांचे शवविच्छेदन करण्यासाठी पाठवण्यात आले असून पोलीस अधिक तपास करत आहेत. या घटनेमुळे दोन्ही कुटुंबांवर दुःखाचा डोंगर कोसळला आहे.
Author: Z 24 News
z24news.dreamhosters.com
