फास्टॅग वार्षिक पास सुरू होणार
जाणून घ्या…कोणते फायदे मिळणार
नवी दिल्ली : राष्ट्रीय महामार्गांवरील टोल प्लाझावरून जाताना दरवेळी थांबणाऱ्या आणि फास्टॅग रिचार्जची चिंता करणाऱ्यांसाठी आता एक मोठी दिलासादायक बातमी आहे. 15 ऑगस्टपासून वार्षिक पास सुरू होणार आहे, ज्यामुळे खाजगी कार मालक वर्षभर सहजपणे टोल प्लाझावरून जाऊ शकतील. भारतीय राष्ट्रीय महामार्ग प्राधिकरणाने ही सुविधा विशेषतः राष्ट्रीय महामार्ग आणि द्रुतगती महामार्गांवर नियमितपणे प्रवास करणाऱ्यांसाठी तयार केली आहे.
3,000 रुपयांच्या निश्चित किमतीच्या या पासमध्ये एक वर्षासाठी किंवा 200 फेऱ्यांपर्यंतची सुविधा असेल, यापैकी जे आधी पूर्ण होईल, त्याची वैधता तेथे संपेल. सरकारचा असा विश्वास आहे की, ही योजना प्रवाशांचा वेळ वाचवेलच, शिवाय टोल प्लाझावरील गर्दी कमी करण्यासही मदत करेल. त्याची माहिती राष्ट्रीय महामार्ग प्राधिकरण च्या वेबसाइटवर आणि ‘राजमार्गयात्रा’ अॅपवर उपलब्ध आहे.
3,000 रुपयांचा वार्षिक पास
केंद्रीय रस्ते वाहतूक आणि महामार्ग मंत्री नितीन गडकरी यांनी ही योजना जाहीर केली आहे. पासची किंमत 3,000 रुपये निश्चित करण्यात आली आहे. तो NHAI पोर्टल किंवा ‘राजमार्गयात्रा’ मोबाईल अॅपद्वारे सक्रिय करता येतो.
एक वर्ष किंवा 200 फेऱ्यांची मर्यादा
हा पास एका वर्षासाठी वैध असेल. परंतु त्याची कमाल मर्यादा 200 फेऱ्यांची असेल. यापैकी कोणताही पास आधी पूर्ण झाला की, तो पास कालबाह्य मानला जाणार आहे.
फक्त खाजगी गैर-व्यावसायिक वाहनांसाठी
ही सुविधा फक्त ‘वाहन’ डेटाबेसमध्ये नोंदणीकृत असलेल्या खाजगी वाहनांनाच उपलब्ध असेल. हा पास ज्या वाहनावर नोंदणीकृत आहे, त्यावरच काम करेल. इतर कोणत्याही वाहनावर वापरण्याचा प्रयत्न केल्यास तो आपोआप निष्क्रिय होणार आहे.
Author: Z 24 News
z24news.dreamhosters.com
